Gibana-bana nga mukabat sa 250 ka mga mag-uuma sa Barangay Adlaon, dakbayan sa Sugbo, ang makapahimulos sa aktibidad nga ipahigayon sa Cebu City Police Offfice (CCPO) karung Pebrero 14, 2023.
Gipahibalo ni Police Colonel Ireneo Dalogdog, ang director sa CCPO, nga sa Valentine’s Day, magpahigayon sila ug aktibidad nga gitawag ug “Gugma nga Gasa alang sa mga mga Mag-uuma”.
Matud pa, usa kini ka medical mission diin ipahigayon ang libre nga medical consultation ug ipanghatag usab ang libre nga mga tambal.
Sa maong barangay ipahigayon usab ang usa ka basketball execution diin mag-atbang sa duwa ang kapulisan sa CCPO ug ang selected players sa Barangay Adlaon.
Giingong lakip kini sa programa sa kapulisan batok sa iligal nga drogas.
Samtang, gidugang usab ni Colonel Dalogdog nga sa Pebrero 14 manghatag usab ang kapulisan ug mga ‘heart-shaped pillow’ nga adunay nakabutang nga ‘ I LOVE CCPO’ diin sa luyo nga bahin niini kay adunay mga numero sa nagkadaiyang police stations sa dakbayan sa Sugbo.
Magpahigayon usab ug 24/7 checkpoint ang kapulisan sa maong adlaw arun sa hugot nga pagbantay sa mga dautang elemento.
