Gikatahong 27 ka tawo ang namatay sa duha ka managlahing insidente sa pagpamusil sa South Africa atol sa katapusan sa semana, Setyembre 26 ug 27.
Kung diin, anaa sa 17 ka tawo ang namatay ug kapin 15 ang nasamdan human gipamusil sa walo ka armadong suspek ang usa ka bar duol sa Johannesburg niadtong Sabado sa gabii.
Samtang, 10 ang namatay ug 11 ang nasamdan sa laing pagpamusil sa usa ka tindahan sa Cape Town sayo niadtong Domingo.
Matod sa kapulisan, posibleng tulis ang motibo sa unang insidente, samtang gikonsiderar usab ang panagbangi tali sa mga grupo nga nalambigit sa ilegal nga pagmina.
Nagpadayon ang imbestigasyon ug wala pay nadakpan nga suspek sa duha ka insidente.
Ang mga pagpamusil nahitabo pipila lang ka adlaw human 11 ka tawo, lakip ang usa ka mabdos nga babaye, ang namatay sa laing insidente sa pagpamusil atol sa usa ka party sa Durban.
