Gisubay sa World Health Organization (WHO) ang mga pasahero sa usa ka biyahe gikan sa isla sa Saint Helena paingon sa Johannesburg nga gidala sa usa ka pasahero sa cruise ship nga namatay tungod sa hantavirus.
Sumala sa South African airline nga Airlink, adunay kinatibuk-ang 82 ka mga pasahero ug unom ka tripulante ang sakay sa biyahe niadtong Abril 25.
Lakip sa mga pasahero ang usa ka babayeng Dutch kansang bana namatay usab sa virus, ug sumala sa WHO, ang kondisyon sa babaye nagkagrabe atol sa biyahe paingon sa Johannesburg.
Basi sa taho, unang ninaog ang babaye gikan sa barko sa Saint Helena niadtong Abril 24 human nakasinati og mga sintomas sa gastrointestinal. Pag-abot sa usa ka ospital sa Johannesburg, namatay siya ug nagpositibo sa hantavirus.
Ang Airlink nag-operate og usa ka semana nga biyahe gikan sa isla, nga mokabat og mga upat ka oras.
Samtang, ang mga awtoridad sa South Africa nagmando sa airline nga ipahibalo ang mga pasahero nga kontakon dayon ang ilang departamento sa panglawas.
Nagduda ang WHO nga ang hantavirus mahimong mikaylap sa mga pasahero sa usa ka cruise ship nga kasamtangang nagdunggo duol sa Cape Verde.
Gawas sa magtiayong Dutch, usa ka pasaherong German ang gitaho usab nga namatay. Karon adunay pito ka kumpirmado ug gidudahang mga kaso sa hantavirus nga nalambigit sa insidente.
