CENTRAL VISAYAS- Pormal na nga nanumpa sa katungdanan ang 288 ka mga bag-ong Jail Officer 1 (JO1) ubos sa Bureau of Jail Management and Penology Regional Office VII (BJMPRO-7) gahapon Hulyo 16, 2026, didto sa University of the Visayas – Main Campus sa dakbayan sa Sugbo.
Personal nga gidawat ni BJMPRO-7 Regional Director JCSUPT Luisito C. Muñoz, CESE, ang bag-ong pundok ug iyang gipahinumdoman ang mga bag-ong jail officers sa paghupot sa labing taas nga sukdanan sa propesyonalismo ug matinud-anong pagserbisyo sa publiko.
Matud ni Muñoz, ang ilang uniporme dili lang basta panapton o insignia, kondili simbolo kini sa pagsalig sa publiko nga ang hustisya, kaangayan, ug pagkatawhanon padayong gipatigbabaw sulod sa mga pasilidad sa bilanggoan.
Dugang niya, ang maong panumpa nagrepresentar sa dakong responsibilidad ug padayong pagpangalagad sa katawhan.
Sa kinatibuk-ang gidaghanon sa mga nanumpa, 256 niini gikan sa regular quota samtang 32 ang ubos sa attrition quota.
Gilangkuban ang maong grupo sa 217 ka mga lalaki ug 71 ka mga babaye.
Ubos sa ilang bag-ong posisyon, ang matag usa kanila makadawat og basic salary nga ₱31,151 matag bulan.
Sa dili pa sila hingpit nga i-deploy sa regional office ug sa nagkalain-laing prisohan sa Central Visayas, ang mga bag-ong JO1 mopaubos una sa usa ka bulan nga Program of Instructions (POI).
Kini aron tudloan sila sa mga polisiya sa BJMP, pamaagi sa jail management, ug mga operasyon.
Ang maong POI magsilbi usab nga preparasyon alang sa ilang mandatory training nga Jail Basic Recruit Course (JBRC) ubos sa National Jail Management and Penology Training Institute sa Philippine Public Safety College (DILG).
