CEBU CITY-Nagpasalamat si Cebu City Councilor Dave Tumulak sa City health ug sa Department of Health (DOH) sa Sugbi tungod sa paspas niini nga pagsanong sa iyang panawagan nga tabangan nga limpyohan ang selda ug matambalan ang mga inmates sa Cebu city Jail para malikayan ang pagkatap pa sa mga sakit sa sulod sa facility ilabina ang kaso sa HIV sa mga preso.
Matud ni Tumulak nga mutanyag og libreng serbisyo ang City Health ug DOH sa nahisgutang facility kung diin magpahigayon sila og libreng X-ray aron masuta kung aduna bay mga priso nga nagkasakit og tubercolosis.
Gihimug-atan ni Tumulak nga magpahigayon sila og libreng HIV testing sa tanang priso sa City jail sanglit nagtoo siya nga mas daghan pa ang mga preso nga infected gawas sa mga una na nga naconfirm nga adunay HIV.
Subay niini, magpadala ang City Health og ilang tao sa maong pasilidad sa sunod nga semana para manglimpyo sa selda aron nga malikayan ang pagkatap sa mga sakit ug aron nga dili na sila mabalaka pa.
Nasayran usab nga e-deliver na ang brand new ambulance sa City Jail aron sa paspas nga aksyon kung ugaling may mga emergency sulod sa bilanggo-an.
Dugang pa sa Konsehal nga pagkahuman niini sugdan na nila ang unang lakang nga kung may mga bag-ong sulod nga priso sa City Jail kinahanglan nga muagi usa kini sa HIV testing.
