Mangulo sila si Agatha Wong, Raph Trinidad, ug Rubilen Amit ang 47 ka mga Filipino athletes nga mosalmot sa 12th World Games nga ipahigayon sa Chengdu, China gikan sa Agosto 7 hangtod 17 ning tuiga.
Nailhan ang World Games alang sa mga sports nga dili bahin sa Olympics, ug unang gipahigayon niadtong 1981.
Sa kinatibuk-an, ang Pilipinas nakadala og 2 ka bulawang medalya, 5 ka silver medals, ug 5 ka bronze medals gikan niini nga kompetisyon.
Matod ni Philippine Olympic Committee President Abraham “Bambol” Tolentino, masaligon sila nga mas daghang medalya ang malangkat ning tuiga kon itandi niadtong 2022 sa Birmingham, diin usa lang ka gold medal ang nadala ni Junna Tsukii sa karate.
Gitudlo usab sila si Agatha Wong ug Raph Trinidad isip flag bearers sa Team Philippines sa opening ceremony sa Tianfu International Convention Center.
Lakip usab sa mga pambato sa nasod mao ang mga iladong atleta sama nila ni: Rubilen Amit, Jeffrey De Luna, ug Chezka Centeno sa billiards; Kayla Napolis ug Annie Ramirez sa jiu-jitsu; Hergie Bacyadan sa kickboxing; Rudzma Abubakar sa Muay Thai; Joyce Reboton ug Reggie Ramirez sa powerlifting; Aislinn Yap sa sambo.
Lakip usab ang 14 ka mga atleta sa floorball, ug 12 ka paddlers sa dragon boat.
