Gidakop sa mga sakop sa Criminal Investigation and Detection Group (CIDG)–Mandaue City Field Unit ang admin staff sa usa ka bodega nga nagtipig og mga imported nga sinina o ukay-ukay sa P. Basubas St. sa Barangay Tipolo, Mandaue City sa nahitabong entrapment operation niadtong Disyembre 11.
Giila ang babaye nga si “Rose,” 28-anyos, residente sa Hernan Cortes St. sa Mandaue City ug lumad nga taga Isabela Province.
Nasakmit sa mga personahe sa CIDG-7 ang 50 ka bundle sa ukay-ukay nga gibanabana nga mokantidad og P364,000, uban sa P11,500 nga buy-bust money.
Naggikan ang operasyon sa impormasyon nga nadawat sa CIDG-Mandaue City nga ang bodega nagtipig og mga ukay-ukay nga mga butang ug giingong namaligya niini. Human mapamatud-i ang taho pinaagi sa pagpaniid, ang mga operatiba diha-diha dayon naghimo og buy-bust operation.
Atol sa entrapment, ang mga awtoridad nakapalit og duha ka bugkos sa ukay-ukay gikan kang Rose. Sa dihang nahuman na ang transaksyon, ang mga operatiba misulod ug gidakop kini.
Kasamtangang gitanggong si Rose sa CIDG Regional Field Unit 7 samtang gihikay na ang mga kaso sa paglapas sa Republic Act 4653, nga nagdili sa komersyal nga pag-import ug pagbaligya sa mga sinina ug mga trapo aron mapanalipdan ang panglawas sa publiko ug ipadayon ang dignidad sa nasud.
