CEBU CITY-Mokabat sa P277 milyones ang hinabang pinansyal ang nadawat sa mga barangay gikan sa lokal nga kagamhanan sa dakbayan sa Sugbo atol sa ceremonial turnover nga gipahigayon sa Social Hall sa Legislative Building.
Diin personal kini nga gitunol ni Acting Mayor Raymond Alvin Garcia, inubanan ni City Councilor Jerry Guardo, City Administrator Kristine Joyce Batucan, ug Assistant City Administrator Atty. Mary Rose Lubino ang mga tseke ngadto sa 59 sa 80 ka mga barangay sa dakbayan.
Gipaambit ni Garcia nga ang nahibiling 21 ka mga barangay nga wala nakadawat sa financial assistance tungod kay wala kini nakakompleto sa mga rekisitos.
Apan, iyang gipasalig nga kon makahatag na kini sa mga saktong dokumento kay madawat na nila ang ayudang pinansyal nga gigahin alang kanila.
Gani, gi-awhag sa opisyal ang mga wala pa nakakompleto nga hikayon na ag ilang mga kakulian arun mahatag na dayon ang ialng mga tseke.
Nasayran nga sa 59 ka barangay, 49 niini ang nakadawat og tag-P3 milyones samtang ang 10 kay nakadawat og tag P13 milyones.
Una ng gipasabot ni City Councilor Franklyn Ong, president sa Association of Barangay Councils, nga ang mga nakadawat og dakong pundo tungod sa ilang gamay nga annual budget maong nagkinahanglan sila og mas dakong tabang gikan sa kagamhanan aron mapondohan og sakto ang ilang mga programa ug proyekto.
