CEBU CITY – Daling gidala sa tambalanan ang Tulo ka mga tawo, lakip ang usa ka abogado, human sila giatake sa usa ka 75-anyos nga lalaki sa lungsod sa Compostela, niadtong Lunes, Agosto 7.
Nasikop ang suspek kinsa giila sa kapulisan nga si Fortunato Rosales.
Matud pa sa kapulisan sa Compostela nga ang pag-atake nahitabo sa gawas sa balay ni abogado Emmanuel Pacquiao sa usa ka gated subdivision sa Brgy. Estaca.
Nasayran nga nibisita si Rosales sa pinuy-anan ni Pacquiao, mga alas 8:25 sa buntag niadtong Lunes.
Kung diin iyang gipangutana ang caretaker sa abogado nga si Jenalyn Domdom Lao kon anaa ba ang iyang amo, si Lao, sa baylo, misulod sa balay aron ipahibalo ni Pacquiao.
Sa dihang migawas si Pacquiao sa balay, giingong gipusil siya ni Rosales sa iyang paa, ug ang buto sa armas nakaaghat sa live-in partner ni Pacquiao nga si Warlita Kintanar, 49, sa pagdagan sa gawas ug pagsinggit og tabang.
Apan gikatahong gipusil ni Rosales si Warlita sa iyang tuong paa.
Giingong gigukod usab sa suspek si Lao ug gidunggab makadaghang higayon una kini nakaikyas.
Hinuon nasikop si Rosales sa mga nirespondeng mga kapulisan.
