Gikiha sa Ombudsman ang mga kanhi ug incumbent nga opisyal sa Cebu City Government tungod sa kontrobersyal nga P239-million garbage deal nga gisudlan niini sa miaging tuig.
Nakakita ang Office of the Ombudsman ug probable cause nga pasakaan og kaso ang walo ka mga ehekutibo sa City Hall tungod sa malversation of funds ug kalapasan sa Anti-Graft and Corrupt Practices Act (Republic Act No. 3019).
Ang mga gipasakaan og kaso naglakip ni kanhi city administrator Floro Casas Jr.; Ang hepe sa Department of Public Services (DPS) nga si John Jigo Dacua; ug Cebu Environmental Sanitation and Enforcement Team (Ceset) head ug kanhi garbage collection and disposal in charge nga si Grace Luardo-Silva.
Lakip usab sa mga respondents mao sila si Allen Omlero Ceballos, inspection officer sa DPS; Romelito Asinjo Datan, city treasurer’s office inspector; Mark Abarquez Ugbinar, general services office inspector; Jerome Visarra Ornopia, acting city accountant; ug Mare Vae Reyes, acting city treasurer.
Dugang pa, gipahamtangan sila sa Ombudsman og silot nga dismissal sa serbisyo ingon man ang pag- forfeiture sa retirement benefits, perpetual disqualification sa paghupot og public office ug pagdili sa pagkuha sa civil service examination.
Ang kaso naggumikan sa hangyo ni Cebu City Mayor Michael Rama nga imbestigahon ang iyang gihulagway nga iregular ug anomalosong kontrata nga gisudlan sa miaging administrasyon sa kontraktor alang sa pagkolekta sa basura sa dakbayan niadtong 2021.
Nadiskubrehan sa NBI ang mga anomaliya sa koleksyon sa basura sa dakbayan, sama sa overbilling ug padding o falsification sa mga dokumento.
Kahinumdoman nga niadtong tuig 2022, gipasaka sa National Bureau of Investigation in Central Visayas (NBI-7) ang mga kasong kriminal ug administratiba sa Ombudsman. | via Bombo Nathaniel Sandoval
