Nag-atubang sa kasong illegal recruitment in large scale ug syndicated ubos sa kalapasan sa Sec. 6 sa RA 8042 as amended by RA 10022 ug gikatahong walay gipataw nga pyansa ngadto sa siyam ka mga suspek human nasikop sa entrapment operation sa Talisay City, Cebu nga gipahigayon sa National Bureau of Investigation sa Central Visayas Regional Office.
Atol sa operasyon sa NBI-7 gipinangulohan sa agent nga si Florante Gaoiran, nasikop ang giingong subject sa operasyon nga si Alice Dumdum Rondez nga maoy gitumbok nga mastermind sa Barangay Pooc, dakbayan sa Talisay atol sa pagselebrar sa Mother’s Day niadtong Dominggo, Mayo 12, 2024.
Lakip usab sila si, Glenard Musngi, Librada Jumanguin, Cristina Tamayo, Elisa Tuñacao, Jocelyn Resaba, Lemuel Ahito, Leon Alegado, ug Levert Fuentes nga susamang mihimakak sa mga pasangil.//
Samtang, ang giingong cashier sa perasyon sa sindikato mao si Cristina Arcilla.
Matud ni Atty. Augustus Renan Oliva nga target sa mga recruiters ang mga mag-uuma nga nagtinguha nga molangyaw aron maka-trabaho sa giingong farm sa Australia ug gipasaligan nga makadawat og sweldo nga di momenos sa P2,000 matag oras.
Apan aron maka-trabaho, gikinahanglan una nga moagi sa nagkadaiyang proseso ug i-comply ang mga rekisitos sama nalang sa pagbayad og P100-P200 nga entrance fee, ug moabot sa P1,500 nga seminar fee, samtang P500 alang sa vlogging fee ug laing P500 sa giingong t-shirt.
Gawas sa seminar may himuon usab kining vlog diin kuhaan og video ang mga na recruit, ug pasul-ubon og kalo sa mag-uuma ug pabasahon sa giandam nga script.
Nasyaran nga ang mga lugar nga nabiktima sa mga suspetsado mao ang lokalidad sa Asturias, Balamban, dakbayan sa Carcar, dakbayan sa Lapulapu, Talisay ug lungsod sa Tuburan.
Subay niini, sa pagsusi sa Department of Migrant Workers sa Sugbo, walay record si Dumdum nga pagpamatuod sa iyang pagpang recruit.
Ug basi sa talaan sa NBI-7 moabot sa 983 ang nitambong sa orientation ug seminar sa Cocoville Beach resort sa lungsod sa Tuburan; 200 sa Sta. Lucia Asturias ug 108 ka mga tawo sa dakbayan sa Talisay.
