CEBU CITY-Nabulabog ang mga residente sa lungsod sa Minglanilla Cebu human giingong mitumaw sa Minglanilla Central Elementary School ang mga giingong manguha og mga bata
Sa pakighinabi sa Bombo Radyo Cebu kang P/Supt. Dexter Calacar ang hepe sa Minglanilla Police Station, giingon niini nga midangop sa ilang estasyon ang 4 ka mga studyante sa maong tunghaan kauban ang usa ka magtutudlo para ipahibalo ang giingong pagsuway sa pagpangidnap
Una niini, gisaysay sa mga bata nga adunay nakatambay nga L300 Van atubangan sa ilang tunghaan ug giingong adunay mahuyang og babae nga kalit lang nga mibunlot sa ilang kamot ug gipugos nga pasakyon sila sa sakyanan apan nakabuhi ang maong bata ug dali kini midagan pabalik sa tunghaan og misumbong sa ilang maestra.
Tungod niini nagpahigayon og follow-up operation ang mga pulis ug nasikop ang 6 ka mga suspek nga nakasakay sa L300 Van ug positibo usab nga giila sa mga bata.
Samtang gihimakak sa mga nasikop nga sila Rheamay Sagmon, Estela A. Montes, James Kevie C Paradela, Marian Serenio, Reymart M. Abobo, ug Federico V. Dela Cruz ang alegasyon batok kanila ug giingong namaligya lang sila og interactive materials sa mga tunghaan apan wala kini makapakita og company ID.
Nakatakda nga pasakaan og kaso nga Child Abuse ang mga suspetado ug sa karon padayon nga gisuta ang mga background niini samtang padayon pa usab ang imbestigasyon sa naasoy nga pagpangidnap.
