Cebu City-Patay ang usa ka Korean National nga gituohang miambak gikan sa 37th floor sa pinakataas nga condominium sa dakbayan sa Sugbo. Ang biktima ang giila nga si Jong Taek Oh.
Sa impormasyon nga nakuha sa Bombo Radyo sa front desk officer (pangan gipugngan ) sa maong condominium nga nag check in ang biktima mga 2 gahapon sa hapon. Matud pa niini nga Special power of Attorney lamang ang dala sa maong Koreano nga mihatag kaniya og pahanugot sa pagpuyo sa maong yunit. Dugang pa niini 10:51 kagabie migawas pa ang maong Koreano ug mibalik pagka 11:13.
Gikahibulong nalang sa mga gwardiya nga ganihang alas 3 sa kaadlawon dunay nihagsa og sa ilang pagsusi nakita nalang nila ang nagbuy-od nga lawas sa Koreano.
Mga alas-7 na sa buntag sa dihang nadawat sa mga kapulisan sa Homecide Section sa Cebu City Police Office ang report. Sa pagrespondi sa mga kapulisan giingong wa sila pasudla.
Gipasabot naman sa front desk officer nga wala una nila pasudla ang mga kapulisan sanglit ila pang gitagsa tagsa pa nila sa pagsusi ang mga unit sa maong condo aron masayran kung asa og kinsa ang maong biktima.
Padayon pa ang imbestigasyon sa kapulisan kalabot sa maong insidente.
