Cebu City- Giisip ni Magdalo Representative Gary Alejano nga peligroso ang nahimong lakang ni Presidente Rodrigo Duterte sa pagpaubos sa lukop Mindanao sa Martial Law.
Sa paghinabi sa Bombo Radyo ni Alejano gibutyag niini nga nabalaka kini sanglit dunay mga lugar nga gipaubos sa Martial Law nga layo naman kaayo sa Lano Del Sur nga maoy kuta sa Maute Group. Matud pa ni Alejano nga kung tumong gayud sa Presidente mao ang pagpapas sa mga ISIS inspired group, mahimo nga ipaubos sa Martial Law ang Lanao del Sur o di ba kaha ang kinatibuk-ang Northern Mindanao lamang.
Gibutyag usab niini nga isip usa ka kanhi sakop sa AFP, nakita niya nga atensyon lamang ang gipangita sa Maute Gruop gikan sa International Terrorist nga ISIS aron nga ilhon sila sa maong grupo. Dugang pa ni Alejano nga tungud sa gibuhat sa Presidente susamang gihatagan lamang niini og katumanan ang gipangandoy sa maong terror group sanglit makaabot man gayud sa international communities ang nahitabo karon sa atong nasud.
Samtang, mipasumbingay usab kini ngadto ni Presidente Duterte diin matud pa nga posible nga nagpasalamat pa ang Presidente sa maong grupo gumikan kay natuman usab ang iyang pangandoy nga maka deklarar og Martial Law sa nasud. Gihimug-atan ni Alejano nga daghan ng mga insurgency problem ang nahitabo sa Mindanao apan wala man nag deklarar og Martial Law ang mga nakalabay nga administrasyon.
Bisan pa man niini, gibutyag ni Alejano nga iyang hatagan og kahigayunan ang gobyerno sa pagsulbad sa problema sa Maute Group apan gitataw niini nga dili kini magpakahilom kung makita niini nga lapas na sa balaod ang maong deklarasyon ni Duterte.
