CEBU CITY-Negative ang resulta sa paraffin test ni Bohol Board Member Niño Rey Boniel. Kini human nga gipa-ubos kini sa parrafin test niadtong ika-8 sa Hunyo human gipasanginlan nga mipusil patay sa iyang asawa nga si Bien Unido Bohol Mayor Gisela Boniel.
Matud ni PCSUP Noli Taliño ang director sa Police Regional Office-7 (PRO-7) nga namasin lang sila nga mag positibo ang Board Member.Apan gi-angkon sa director nga gilauman na kini nila nga mag-negative tungod kay pipila na ka oras ang nakalabay human sa krimen ug giingong daghan na ang posible nga mahitabo.
Matud pa ni Taliño nga daghan usab ang rason kung nganu nga nagnegative sa paraffin test si Board Member Boniel. Giingong posible nga nakahugas sa iyang kamot si Boniel human sa pagpusil sa iyang asawa ug giingong naka-apekto usab ang direction sa hangin atol sa pagpusil diin posible nga nadala sa direction sa hangin ang gun powder.
Bisan paman niini gihimug-atan ni Taliño nga bisan pa og nagnegative sa paraffin test si Board Member Boniel aduna pa silay lain nga mga ebidenysa nga tan-awon nga makatabang sa ilang imbestigasyon.
