CEBU CITY – Giisip ni Akbayan Representative Tomasito ‘Tom’ Villarin nga usa ka matang sa pag-abuso sa parliamentary privilege ang bag-o na usab nga balaudnon ni House Majority Floor Leader and Ilocos Norte 1st District Representative Rodolfo Fariñas nga pagtukod ug Philippine Legislative Police aron sa paghatag og security sa mga kongresista apil na sa ilahang mga pamilya.
Matud ni Villarin nga susamang nagsige nalang ug pinagayo ug pribelihiyo ang mga kongresista sa bisan unsa nga makapaayo alang sa ilahang kaugalingon.
Dugang pa nga nagpaka-arun ingnon gayud nga mga espesyal sila apan ang buhis nga gikan sa katawhan ra man ang mugasto sa ilahang mga luho.
Dili usab makatarunganon matud pa nga ang buhis sa katawahn muadto lamang sa security sa mga kongresista ug sa ilang pamilya.
Gibutyag pa ni Villarin nga nagkuwang man gane ang pulis karon ug musamot pa kini kung ang uban ipang-assign pa sa mga Congressman.
Sugyot niini nga kung gusto gayud sa mga congressman nga ma-secure sila og aduna silay hulga sa ilahang kinabuhi, mamahimo man sila nga mag hire og private security aron nga dili na mapasa sa mga tax payer ang pag-sweldo kanila.
Gihimug-atan ni Villarin nga sila sa minority bloc supak gayud sa HB No. 6208 sanglit usa kini ka matang sa pagpangabuso sa gahum.
