Cebu City- Mibisita sa Cebu si Senator Riza Hontiveros para sutaon ang insidente sa wala pagdawat sa Chong Hua Hospital sa usa ka samdang pulis nga si PO3 David Naraja nga nasamdan sa operasyon tungod kay wala kini pang downpayment nga 10,000 pesos.
Matud ni Hontiveros nga kini usa ka kalapaasan sa Anti Deposit Law kung diin siya mismo usa sa mga author. Siya nagkanayon nga ang bago nga balaud mupahamtang ug dako nga penalty sa mga tambalanan nga makalapas niini.
Gihimug-atan sa senadora nga dili pwedeng pugson ang pamilya sa pasyente nga maghatag og deposit para lang ma-admit ilabina kung kini emergency.
Naghatag na usab matud pa si Hontiveros og suwat sa Police Regional Office-7 Director nga si PCSUPT Jose Mario Espino para ipakita nga andam siya nga muhatag og assistance kung ugaling mupasaka kini og kaso.Gi-awhag usab niya ang Department of Health (DOH) nga imbestigaran ang nahisgutang insidente.
Samtang, gibutyag usab sa Senador nga sunod nilang tan-awon ang pagimprove sa Anti Hospital Detention Law kung diin dili usab pwede nga pusgon nga pwedeng pabayaron ang pamilya nga naconfine nga pasyente para lang madischarge.
Tumong matud pa niini nga ikonsiderar ang kaayohan sa pasyente ug sa hospital.
