CEBU CITY – Hustisya ang singgit karun sa pamilya sa 4 anyos nga bata human nga na-igu sa saag nga bala sa nahitabung anti-drug operation kagahapun sa Barangay Ermita, dakbayan sa Sugbo.
Sa pakighinabi sa Bombo Radyo kang Mark Anthony Abatayo, ang amahan sa biktima, gibutyag niini nga gusto nila nga masayran ang kamatu-uran ingun man nga manubag ang sad-an.
Matud ni Abatayo nga basi sa asoy sa iyahang kumpare nga mao ang gisakyan sa pulis nga nagdala sa biktima sa ospital, giingung mi-angkun ang maong pulis nga nasipyat kini sa pagpaboto sa iyahang armas nga milapus sa bongbong sa panimalay sa biktima.
Sukwahi kini sa pamahayag sa hepe sa Carbon Police Station nga si Police Sr/Insp John Kareen Escober, nga giingung wala sa iyahang mga tawu ang nakapaboto sa ilahang armas.
Dugang pa nga adunay CCTV footage kung diin makita nga positibo nga ang maong pulis ang nagdala sa biktima sa ospital.
Samtang, mipaabut na ug tabang pinansyal si Cebu City Mayor Tomas Osmeña.
Misaad usab sila si Cebu City Police Office Director Police Sr/Supt Royina Garma ug PRO 7 Regional Director Police C/Supt Debold Sinas ug tabang pinansyal ingun man ang pagkab-ut sa hustisya alang sa inosente nga bata nga nadamay lang sa maong drug operation.
