CEBU CITY-Gi-ubanan sa hanging Habagat ang nahitabing sunog sa Sitio Lower Lupa, Brgy. Kamputhaw, Cebu City kung diin muabot sa 90 ka mga balay ang nalamoy ug dul-an 1 milyon pesos ang danyos niini.
Sa inisyal nga imbestigasyon sa Cebu City Fire Department, nagsugod ang sunog sa balay sa ginganlag Oscar Limbag pasado alas 4:05 sa hapon adlaw ng Sabado, Agosto 8 diin gisaka kini sa general alarm.
Sagad sa mga nalamoy sa kayo mao ang mga balay nga ginama sa light materials hayan dali nga nakakatap ang kayo. Nagakalisod usab ang mga bumbero sa pagpawong sa kayo tungod sa kahoot sa agi-anan hayan gitabangan nalang kini sa fire stations sa Mandaue, Talisay, ug ingon man sa usa ka Chinese fire truck.
Saysay pa sa barangay tanod nga si Nomeriano Ligan Jr. nga nataranta siya tungod kay hapit nga malakip ang iyang balay sa sunod ug nabalaka kini nga wala na siyay uli-an.
Kalit usab nga mibunok ang kusog nga uwan dala sa hanging Habagat samtang gipaningkamotan sa mga bombero ang pagpawong sa kayo sanglit milanat kini og 3 ka oras hangtud nga madekalarar nga “fire out” pasado 6:45 sa gabii.
Matud usab ni Cebu City Fire Marshall Noel Ababon, nga gisuta nila kung tinood ba nga gikan usab sa usa ka drugden ang kayo ug ilang karong gitun-an kung tinuyo ba ang maong insidente.
Nagpalabay og gabii ang mga nasunugan sa usa ka covered court sa Brgy. Kamputhaw ug temporaryo kining ihiklin sa Gymnasium sa ilang lugar.
Samtang nagkanayon usab ang kapitan sa barangay nga si Jessica Cadungog, nga nakig-alayon na sila sa Cebu City Government para sa tabang pinansyal ug pagdistribute sa mga relief goods.
Gisusi pa usab kung duna bay namatay sa maong sunog human nga dunay nataho nga usa ka lalaki ang mibalik sa iyang balay nga nasunog para mukuha og gamit. Wala hinooy natala nga nasamdan o grabeng naangol sa maong panghitabo.
