CEBU CITY – Miabot og 1.5 milyones pesos nga balor sa shabu ang nasakmit sa Philippine National Police (PNP) sa managlahing drug operations sa Brgy. Carreta ug Brgy. Mambaling, dakbayan sa Sugbo.
Nadakpan sa Brgy. Carreta si Rolly Laborte nga nakuhaan og 1 ka medium ug 12 ka ginagmay nga pakete sa shabu nga kapin 300,000 ang balor niini, samtang nadakpan usab sa Brgy. Mambaling si Arnold Lupo nga nakuhaan usab og 4 ka medium packs sa shabu nga moabot sa balor nga 1.2 milyones pesos.
Nasayran nga nasakop si Lupo sa usa ka dagkong drug seller group sa Cebu City diin gi-distribute kini sa Brgy. Carreta ug sa mga kasikbit nga barangay sa maong syudad. Samtang distributor usab si Laborte sa shabu sa tibuok tungang kabisay-an diin gikan sa Dumaguete City ang sagad nga mopalit niini.
Matod sa hepe sa PNP Drug Enforcement Group VII nga si PSupt. Glen Maya nga gikan sa laing lugar nagagikan ang minilyong balor sa shabu ug moabot kini sa mga kasikbit nga probinsya ang supply niini.
Sayran pa sa PNP gikan sa mga dinakpan ang uban pang detalye sa transaksyon sa shabu pinaagi sa tactical interrogation.
