CEBU CITY – Patay ang 2 ka jail guards sa Cebu Provincial Detention and Rehabilitation Center (CPDRC) ug usa ka high profile inmate sa nahitabong pagpamanhig sa Unit 5, Brgy. Kalunasan, Cebu City kaganihang buntag.
Nailhan ang mga biktima nga jail guards nga silang Bernie Bayutas ug Joel Teves, kauban ang drug personality nga si Jerrefer Peregrino, taga-Leyte ug nadakpan kaniadto sa Argao, Cebu.
Padung na unta ang 3 sa Cebu City Hall of Justice sa Quimonda Bldg., sa nahisgutang dakbayan sa dihang kalmadong gipusil sa 4 ka wala pa mailhing mamumuno nga nagsakay og motor.
Matod pa ni CPDRC Jail Warden JSupt. Reynante Valmoria nga mo-file unta sila sa kasong “illegal possession of drugs” sa Quimonda kagahapon apan naabtan sila sa cut-off maong mibalik sila diha kaganihang buntag. Dugang pa ni Valmoria nga nahasubo siya sa nahitabo sa 2 ka kawani nila gani dili siya makatuo sa nahitabong insidente.
Samtang nagpadayon pa ang imbestigasyon sa nahitabong pagpamanhig ug matod pa sa hepe sa Guadalupe Police Station nga si C/Insp. Edward Sanchez nga padayon pang gipangita ang posibleng mga motibo niini.
Nasayran nga kasuhan si Peregrino sa RA 9165 diin nakuhaan siya og ginadiling drugas atol sa greyhound operation sa miaging semana samtang gituohan ang 2 ka jail guards nga naay kalabutan pagsulod og mga kontrabando sulod sa prisohan.
