CEBU CITY – Selos ang gitudlong rason sa pagpusil sa bana sa iyahang asawa ug pagkahuman , nagpakamatay usab kini sa Brgy. Inayawan, Cebu City.
Ang biktima ang giila kang Gina Cabo, 48 anyos; samtang ang suspek mao ang bana niini nga si Aldrin Cabo, 48 anyos ug usa ka retired Coastguard personnel.
Matud ni C/Insp. Regino Maramag, hepe sa Pardo Police station, gibutyag niini nga giadfto pa sa suspek ang asawa niini sa balay sa iyahang ugangan gumikan kay wa kini miuli sa ilahang balay.
Mi-amen pa ang suspek sa iyahang ugangang babaye ug nangutana kung asa ang iyahang asawa. Dali usab niini giadto ang lawak nga nahimutangan sa biktima ug gi-lock ang pultahan.
Nakurat nalamang ang inahan sa biktima sa dihang nakadungug ug sunud-sunod nga pagbuto gikan sa lawak sa magtiayon.
Sa dihang mirespondi ang kapulisan, wa nay kinabuhi ang duruha diin 5 ka igo sa iyahang buko-buko ang naangkon ni Gina samtang nagpusil sab sa iyahang kaugalingon ang suspek.
Nasuta usab sa kapulisan nga nakigbuwag ang biktima sa iyahang bana ug mubalhin na unta kini ug balay gumikan kay dapatan siya sa suspek sa higayon nga mahubog kini.
