Cebu City-Patay ang usa ka lalaki samtang samdan usab ang kauban niini sa dihang nakasugat ug aksidente sa Brgy Abugon, Sibonga Cebu.
Ang namatay ang giila nga si Ruben Catipay, 27 anyos ug residente sa Sitio Nazareth, Buhisan Cebu City kinsang angkas sa motor nga gimaneho ni Francis Vallez ug silingan ni Catipay.Matud ni PO3 Edward Semilla sa Sibongga PNP nga nahitabo ang insidente pasado 3:15 ganihang kaadlawon diin ang nagbayahe paingon sa dakbayan sa Sugbo ang sakay sa motorsiklo apan pag abot sa Brgy Abugon , dunay usa ka wa pa matino nga cargo truk ang nakasaghid sa motor hinungdan nga natumba kini ug nalabay sa pikas lane ang angkas nga si Catipay.
Kusug matud pa ang pagdagan sa motorsiklo ug wala usab nakabantay ang dako kaayo nga cargo truck.Dugang pa nga ang nalabayan kang Catipay, duna sab padulong nga prime mover nga nagkarga ug semento nga paingon sa Bohol Via Taloot Argao. Gumikan niini nalatayan matud pa sa maong prime mover ang biktima.Bisan ug hinay ang dagan sa maong truck wala na kini nakabantay sa nalabay nga tawo nga naa sa iyahang agianan.
Dead on arrival nga nalandig sa tambalanan si Catipay samtang boluntaryo usab nga misurender sa kapulisan ang driver nga si Joey Pelaez Amoroto, 39 anyos ug residente sa Katarungan Bohol.
Samtang gidala usab sa Boljoon pulis station ang driver sa motorsiklo nga si Valez human nga gitudlo nga maoy nagawat ug mga manok igtatari sa maong lugar.
Nasayran nga nakuha nilang Valez ug Catipay ang mga manok igtatari diin 5 niini ang patay gumikan sa insidente.Gituohan usab nga gikan nangawat ang duruha sa dihang nahitabo ang insidente.
