Cebu City-Patay ang duha ka mga lalaki human nag-ilog sa usa ka babaye sa Sitio Mahayahay, Daanlungsod, dakbayan sa Toledo.
Ang mga namatay ang giila nga sila si Joel Cabaluna, 43 anyos ,residente sa nahisgutang dapit ug Inigo Sibugal Jr., 41 anyos ug residente sa Brgy Bato sa maong dakbayan.
Matud ni PO1 Bartomiano Gargar sa Toledo City PNP, nagkalalis matud pa sila si Cabaluna ug Sibugal gumikan sa daan na usab nila nga away human nga ang kapuyo kaniadto ni Cabaluna nga si Liezel Cañete ang nahimo na usab nga kapuyo karon ni Sibugal.
Misangpot ang maong lalis sa pagpanigbas ni Sibugal ngadto kang Cabaluna nga nakabsan gayud sa iyang kinabuhi.
Apan matud pa nga mibawos ang mga kabanay ni Cabaluna ug gitigbas usab nila si Sibugal.
Nagtingkagol na hinoon karon sa lock up cell sila si Hilbert Larino, Remegio Cabaluna, Ino Larino ug Junel Cabaluna human nila gitabangan sa pagtigbas si Sibugal.
Giandam na usab sa kapulisan ang kasong ipasaka batok sa mga suspek.
