Cebu City-Nanawagan karon ang managsuon nga Banilad sa ilang Kuya nga musurrender na sa pulis para malimpyo ang ilang pangalan kalabot sa pagkalambigit sa kasong pagpatay sa 62 anyos nga negosyante sa dakbayan sa Talisay probinsya sa Sugbo.
Sa ekslusibo nga pakighinabi sa Bombo Radyo kang Jay r ug Jeffrey Banilad, gihimakak niini nga duna silay partisipasyon sa krimen.
Matud ni Jay R nga sobra sa 5 ka buwan na kini nga wala na magtrabaho sa biktima samtang matud usab ni Jeffrey nga mi-uli siya sa ilang lugar sa lungsod sa Badian niadtong Oktubre 28 ug ang ilang kuya nga si Johny na lang ang nahabilin sa ilang gitrabaho-an.
Gi-angkon ni Jay R nga niadtong katapusang panagkita nila ni Johny niadtong Nobyembre 2, nabantayan niya nga susama nga dili kini mahimutang ug nananghid kini nga dili usa kini maka-uli sa ila ug dili nalang pangita-on.
Gi-awhag sa duha ang ilang kuya nga kung tinood nga wala kini kalambigitan sa krimen kinahanglang magpakita kini sa police station tungod kay lisod matud pa ang ilang kahimtang nga sila ang nag-antos apan wala silay sala.
Samtang matud usab ni Police Supt. Marlu Conag, ang hepe sa Talisay PS nga andam matud pa nga muhatag og reward money ang pamilya sa biktima nga si Victoria Po Loa sa kung kinsa man ang makatudlo sa gikahimutangan sa suspek nga si Johny Banilad.
Nasayran nga ang biktima usa ka negosyante og ilimnong makahubog nga nag susply sa Mindanao.
