(Kuha ni Bombo Eric Amaro)
CEBU CITY – Misaad ang Governor-elect sa Probinsya sa Sugbo nga si Gwendolyn Garcia nga pinaagi sa panaghiusa sa tanang mga Sugbuanon, mahibalik sa pagka-numero uno ang Sugbo.
Kini ang gibutyag ni Garcia human nga giproklamar sa hingpit sa Provincial Board of Canvassers kaganiha sa Cebu Provincial Capitol.
Atol sa iyang speech, gihandum ni Garcia ang “darkest side” sa iyang kinabuhi niadtong Disyembre 2012.
Kahinumduman nga gisuspensuhan ni kanhi-Presidente Benigno Noynoy Aquino si Garcia sulod sa 6 ka buwan gumikan sa “grave abuse of authority”.
Gitataw usab sa governor-elect nga ang mga Sugbuanon maoy mipili kaniya aron mabalik sa kapitolyo isip gobernadora.
Gitambagan usab ni Garcia ang iyang mga kaatbang nga mag-move on na lang ug dili gayud angayang kaminusan ang pagkagamhanan sa mga Sugbuanon isip mga botante.
Gipasalamatan ni Garcia ang mga misuporta kaniya ug mihulagway nga usa ka “shining moment” ang kadaugan niini.
