CEBU – Gituhu-an ni Police Brigadier General Debold Sinas, PRO 7 Regional Director, nga ang kapin 2,000 ka mga beneficiaries sa ilahang medical outreach
program sa Sitio Kambugtong, Barangay Bantolinao, Manjuyod, Negros Oriental, ang nasagulan ug pipila ka mga sakup sa New People’s Army (NPA).
Matud ni Sinas nga kadaghanan gayud sa mitambung sa ilahang medical mission mao ang mga lalaki sukwahi sa mga nakalabay nila nga medical mission nga
kadaghanan mga babaye, ug kini gituhu-an nga nag-obserbar lang sa ilahang kalihukan.
Gibutyag usab sa director nga niadtung adlaw nga Biyernes, ang adlaw sa dili pa ang medical mission, nagpahigayun ug inspeksyon ang kasundaluhan ug kapulisan sa area ug adunay nakita nga walo ka mga bangag nga gipamutangan ug mga wire kung diin tima-ilhan nga butangan kini ug mga IED (improvised explosive device).
Nasayran nga ang nahisgutang lugar ang ‘identified’ nga baga sa NPA.
Subay niini, gipadayag ni Sinas nga dili gustu ang maong rebeldeng grupu nga makapahigayun ug medical mission ang NPA sa ilahang balwarte arun nga dili ma-expose ang mga bakak nga dili makama-u mutabang ang gobyerno.
Kahinumduman nga niadtung adlaw nga Sabado, misangput sa engkwentro ang nahitabung joint medical mission sa kapulisan ug kasundaluhan kung diin namatyan ug usa ka sakup ang tropa sa gobyerno nga si CPL Leoter Cagape, samtang usa usab ang namatay sa habig sa NPA nga wala pa mailhan ug adunay tulu ang nasikup.
