CEBU – Daku ang pagsalig ni PRO 7 Regional Director Brigadier General Debold Sinas ngadtu kang Police Major Orlando Carag nga mangulo sa kapulisan sa Talisay City Police Station.
Kini ang gipadayag ni BrigGen. Sinas atul na sa turnover ceremony nga gipahigayun kaganihang buntag sa Talisay City Hall.
Matud ni Sinas nga nasayud na si PMaj Carag sa istilo niini ug iyaha lang tambag sa bag-ung hepe nga andamun ang kaugalingun alang sa bisan unsang sitwasyun nga masugatan sa pagpanerbisyo niini isip usa ka pulis.
Gipahibalu sa police director nga iyaha nang gimanduan si Carag nga mu report ngadtu kang Talisay City Mayor Samsam Gullas ka-usa sa matag semana.
Sigon pa nga mikunhud na ang shabu sa dakbayan sa Talisay apan gumikan kay usa man kini ka negosyo hayan magpadayun gayud kini.
Subay niini, gisiguru ni Sinas nga dili gayud nila hunungan ang mga drugista sa dakbayan pinaagi usab sa pakig-alayun sa Local Government Unit (LGU).
Nasayran nga si Police Lieutenant Colonel Marlu Conag usab ang ma-assign na karun sa Provincial Intelligence Branch-Drug Enforcement Unit sa Cebu Provincial Police Office.
Samtang, pagwagtang sa tagline nga “shabu city” ang numero uno nga pagatutukan sa bag-ung hepe sa Talisay PNP nga si Police Major Orlando Carag.
Gibutyag ni PMaj Carag nga nasayud kini nga usa ang dakbayan sa Talisay nga na-ila nga naghitak sa iligal nga drugas hinungdan nga himu-un kini niya nga top priority ang pagwagtang niini sa hunahuna sa mga tawu.
Dugang pa nga daku kini nga hagit kaniya isip bag-ung hepe, dugang pa nga bag-u usab ang iyahang mga personnel.
Hinu-un, gipasalig ni PMaj Carag nga ipadayun ang nasugdan ni Police Lt. Col. Marlu Conag kinsang nagpahigayun ug mga subsub nga operasyon subay sa kampanya batuk iligal nga drugas.
Sa habig usab ni Police Lt. Col. Conag, nagpasalamat kini nga naka-survive sa iyahang paglingkud isip hepe sa kapulisan sa Talisay kung diin iyaha kining gihulagway nga usa ka “tough job” gumikan sa kadaghang operasyon, ingun man ang pagsukul sa kadaghanan sa ilahang mga subject.
Full support ang Talisay-LGU ubus sa bag-ung administrasyon ni Mayor Gerard ‘Samsam’ Gullas ang kapulisan sa kampanya batuk iligal nga drugas, ingun man sa kriminalidad.
