BUKIDNON – Gipamatuod sa usa ka acting chief of police sa Kalilangan Police Station ang katakus sa iyang kasingkasing ngadto sa usa ka iro.
Tungod niini, nahayagan na ug nahatagan og bag-ong paglaum ang iro nga napiang ang duha ka tiil human nga nahatagan og improvised wheelchair aron makadagan.
Mibilib ang katawhan ngadto ni Police Captain Patrick Castro tungod sa iyang pagtabang sa iro nga si Tiger.
Matud ni Castro nga miabot sa ilang buhatan si Tiger nga nagtaki-ang ug maglisud na sa paglakaw.
Dugang pa sa police officer nga dili na magamit ang duha ka tiil ni Tiger sa iyang likod ug giguyod lang niya kini.
Tungod niini, gitauran ni Castro ang pipila ka mga PVC pipes ug gibutangan og ligid gikan sa naguba nga stroller.
Makalakaw na si Tiger gamit ang iyang improvised wheelchair isip suporta sa iyang tiil.
