LAPU-LAPU CITY – Nasikup ang usa ka PUJ driver human niini nga gihinul ang paa sa iyahang dalaga nga pasahero.
Giila ang suspek nga si Alfredo Nogadas, 56 anyus, ug residente sa Barangay Gun-ob, dakbayan sa Lapu-Lapu.
Gipadayag ni Police Corporal Thelma Degamo sa Women’s Desk sa Cordova Police Station, nga basi sa pamahayag sa biktima, giingung misakay kini sa front seat ug nagsugud sa pag-isturya ang drayber ug mga malaw-ay nga butang.
Matud pa nga gumikan sa kahadluk sa biktima, giingung gisakyan na lang niini ang mga gisulti sa drayber hangtud nga misugud na paglihuk ang kamut sa suspek.
Giingung gihinul-hinul sa drayber ang paa sa biktima kinsang naka-shorts lang, hangtud nagkadu-ul ang kamut niini sa pribado nga bahin sa babaye.
Nakapangayu ug tabang ang biktima sa dihang mihunung ang jeep sa lugar kung diin adunay mga traffic enforcer.
Dali nga gisikup sa mga traffic enforcer ang suspek ug giturn-over gilayun sa Cordova Police Station.
Naka-detain sa nahisgutang police station ang suspek ug nag-atubang ug kasong unjust vexation. (SBR)
