CEBU CITY — Padayon pa nga gisuta ang motibo sa pagpamusil patay sa usa ka abogado sa may Sunrise Looc Guihulngan Negros Oriental kagahapon sa hapon.
Naila ang abogado nga si Atty. Athony Hernandez Trinidad samtang naangol usab ang iyang asawa nga si Novie Marie Quirante Trinidad ug parehong 53 anyos, ug kasamtangan nga nagpuyo sa San Carlos City, Negros Oriental.
Matud ni Police Executive Master Sergeant Jerome Delara nga gikan matud nga mitambong sa hearing ang abogado kauban ang iyang asawa nga secretarya usab sa ilang law firm.
Sakay matud pa kini sa ilang sakyanan gikan sa La libertad ug padulong na pauli sa dihang kalit matud pa nga gitaparan og motor nga dunay sakay nga duha ka lalaki pag-abot sa may Sunrise Looc.
Basi sa imbestigasyon nga gipusil dayon sa makadaghang higayon sa mamumuno ang sakyanan sa abogado ug pagkaigo ni Anthony nga mao usab ang nagmaneho, nabangga ang sakyanan sa usa ka paril.
Naigo usab ang asawa niini ug naangol pa ang usa ka sikad driver atol sa pagkabangga sa sakyanan.
Pagresponde matud pa sa kapulisan naglisod sila og kuha sa mga lawas sa biktima tungod kay maayo kining pagkasampak sa paril ug ilang pang gi-aswat.
Dali nga gidala sa tambalanan ang tulo apan gideklarar nga dead on arrival ang abogado.
Luwas ang sikad driver apan padayon nga nakigbisog sa lit-ag sa kamatayon ang asawa sa abogado.
Ila usab karon nga gi-review ang kaso nga gihandolan sa maong abogado nga posibleng makatabang sa imbestigasyon ug ingon man ang hearing nga gitambongan niini.
