BLANGKO pa ang motibo sa kamatayon sa usa ka lalaki human gipusil sa wala mailhing gunman sa Sitio Aballe, sa Baranrgy T. Padilla, dakbayan sa Sugbo.
Subay sa pagkabasa sa dalan tungod sa makusog nga uwan, naligo usab sa kaugalingong dugo ang biktima nga si Jerwin Jumao-as, gibana-banang anaa sa 27 anyos, ug nagpuyo sa nahisgutang lugar.
Matud sa imbestigador nga si Police Chief Master Sergeant Romel Bangcog sa Parian Police Station, adunay mipara ngadto sa biktima nga nagmotor dayon og pusil kaniya.
Atol sa pasiunang imbestigasyon, gihiling sa kapulisan ang mga binangan nga kwarta sulod sa U-box sa motor sulod sa crime scene.
Dugang pa ni Bangcog nga ila pang sutaon ang criminal records sa biktima aron matino ang background niini.
Base sa pagsaysay sa pamilya ug sa barangay tanod, nadakpan kaniadto ang biktima sa kasong may kalabutan sa illegal drugs ug paghupot og armas nga walay lisensya.
Wala usab mipadayag ang inahan sa detalye may kalabot na sa iyang kasagmuyo sa kalit nga kamatayon sa iyang anak.
Samtang nagdanguyngoy ang inahan, mibutyag kini nga, matud pa, maglisud og remit ang iyang anak.
Kasamtangang giditerminar pa sa kapulisan kung unsa ang motibo sa kamatayon sa biktima samtang padayon pang giila ang gunman niini. (With reports by Bombo Lahvi Quiñones/GN)
