CEBU CITY-Desidido nga mupasaka og kaso ang biktimang babae nga nakita sa nagviral nga video kauban ang 4 ka mga lalaki kinsang mi-molestiya kaniya ug napasa-pasa pa ang maong video sa internet.
Kini human nga gikompirmar ni PRO-7 Regional Director Police Brigadier General Debold Sinas nga mibisita sa iyang buhatan ang pamilya sa biktima para magpatabang ug mupasaka og kaso.
Nasuta nga ang duha ka mga lalaki sa video ang minors nga nag-edad og 15 ug 16 anyos samtang duha usab ang naa sa hingkod nga panu-igon.
Sa oras nga mapasaka na matud pa ang kaso, kinahanglan nga mu-surender na matud pa ang mga suspect. Hinungdan nga mi-apelar ang director sa mga ginikanan sa mga suspect nga minors nga i-surender na ang ilang mga anak.
Dugang pa niini, gihimug-atan usab ni Sinas nga pasakaan usab og kaso ang mga nag-upload sa maong video ug gishare sa social media.
Sa karon, duna na matud pa silay napulo ka mga suspect human nga ilang ‘na-screen shot’ nga mishare og mi-upload sa maong video.Panawagan karon ni Sinas nga dili na i-upload o i-share pa ang video sanglit kung ma-trace nila kini, mapasakaan gayud kini og kaso.Looy na usab matud pa ang biktimang babae.
Nakig-alayon na usab si Sinas sa CCPO pinaagi ni PCol. Gemma Vinluan para sa dugang imbestigasyon ug ingon man sa CIDG.
Samtang mihimo na usab og ilang imbestigasyon ang duha ka dagkong unibersidad sa Sugbo batok sa mga suspect nga nagtoon sa ilang tunghaan.
