CEBU CITY — Nagbakho sa kalagot ang inahan sa biktima nga si Justine Andayop kinsang napalgang patay ug giluglog pa ang liog sa kalibunan sa Purok Caimito, Barangay Guimbawian lungsod sa Pinamungahan, Cebu.
Matud ni Bina Andayop ang inahan sa biktima nga Biyernes palang wala na niya makita ang anak tungod kay mibalik man kini sa Carbon Public Market sa dakbayan sa Sugbo aron namaligya.
Hangtud nga gitawagan nalang matud pa kini sa iyang mga anak nga nawala na si Justine hinungdan nga mi-uli siya og ilang gipangita.
Hapit dili na makalitok ang inahan niini sa pagsaysay nga hapon na nga napalgan nila ang iyang anak ug wala na kini kinabuhi ug gikuhaan pa og ubol-obol.
Sigon ni Bina nga silingan nila ang mibuhat sa ingon ug gusto niya nga siya mangunay og tumba niini.
Iya matud pa buhaton usab sa suspect ang gibuhat niini ngadto sa iyang anak.
Kombinsido ang inahan sa biktima nga mao kini ang nagpatay sa iyang anak tungod kay mao man kini ang kanunay nga mag-agi-an sa ilang balay.
Samtang, sa pagsuwat niining balitaa, nagpabiling blangko ang Pinamungajan PNP sa kamatayon sa dalagita.
Matud sa hepe nga si Police Major Felicisimo Aranas Jr. nga ang silingan sa biktimang mao ang gitumbok nga person of interest.
Dugang pa ni Aranas nga palawman pa ang imbestigasyon sa kamatayon ni Justine ilabi na nga wala pay maka-pinpoint sa responsable niini.
Hinuon wala pa matino sa kapulisan kung nahilabtan ba ang biktima sanglit kumpleto pa man ang sapot niini sukad nga narekober ang patayng lawas sa kalibunan.
Gikatakdang ipaubos sa forensic examination sa PNP Cybercrime ang cellphone sa biktima aron makakuha og dugang pang background niini. (with reports by Bombo Lahvi Quiñones/FDP/GN)
