Giduso na sa Executive Department sa Provincial Government ngadto sa Hunta Provincial ang proposed 2020 annual budget nga mokabat ngadto sa kapin 12 billion pesos.
Kini ang gitataw ni Cebu Provincial Governor Gwendolyn Garcia diin, matud pa, mas dako ang proposed budget og 156 percent itandi sa 2019 budget nga mikabat lang sa P4.7 billion.
Ang kinadak-an nga gahin sa maong pundo, mapunta ngadto sa Social Services diin moabot kini ngadto sa P6 bilyones.
Ikaduha mao ang infrastracture nga gigahinan ug 5-bilyones ka pesos, ug ang ikatulo mao ang pagpalambo sa mga tambalanan sa probinsiya nga gigahinan ug 4.2 bilyones ka pesos.
Matud sa gobernadora nga nakatabang sa dako nila nga budget karon mao ang mag-redirect sa budget ngadto sa prayoredad nga mga programa sa kapitolyo ug ingon man gikan usab sa IRA nga madawat sa kapitolyo gikan sa nasudnong kagamhanan.
Gipaabot na lang usab ni Garcia nga malakip sa agenda sa provincial board ang proposed budget aron matuki ug mapasar.
