Makigkita si Cebu City Mayor Edgardo Labella sa mga nanag-iya og shopping malls ug security agencies aron sutaon ang ilang pamaagi sa pagpatuman sa seguridad.
Kini subay na sa nahitabong pagpanulis sa J Center Mall niadtong Sabado, Oktubre 19 sa gabii diin gidala sa mga tulisan ang mga cash ug alahas nga nagkantidad og 136 million pesos.
Karong adlawa, sutaon sa mayor kung unsay mga security measures ang gipatuman sa mga malls sa dakbayan sa Sugbo.
Kini aron malikayan ang susamang insidente sa dakbayan sa Mandaue.
Matud ni Labella nga iyang gimanduan si Cebu City Police Director Colonel Gemma Vinluan nga ipakatag ang mga sakop niini sa mga shopping malls, bangko, ug uban pa alang sa hugot nga seguridad batok sa mga tulisan.
Gihatagan og importansya sa mayor ang komunikasyon ug koordinasyon sa managlahing mga police units aron usab nga himoong luwas ang nahisgutang mga establisimento.
Samtang misugyot usab si Labella nga pakusgan pa ang intelligence gathering sa mga barangay sa dakbayan ingon man ang pagsuta sa mga landlady kung kinsa man ang mo-istar sa ilang lugar.
