CEBU CITY-Andam na ang Cebu South Bus Terminal (CSBT) alang unya sa pagdagsa mga pasahero nga mama-uli sa probinsiya arun sa paghandom sa adlaw sa mga Santos ug Kalag.
Gipahibalo ni Carmen Quijano, ang CSBT operations manager, nga nag-request na sila sa Cebu Provincial Capitol ug dugang nga 25 ka mga security guards alang sa dugang nga seguridad sa terminal.
Gawas sa mga guards, gisiguro usab ni Quijano nga naka-deploy sa terminal ang pipila ka mga sakop sa PNP, ingun man ang mga taga PDEA, medics ug ambulansya.
Matud pa nga adunay 32 ka mga CCTV camera ang gi-install sa terminal ingun man mga tawu nga mag-monitor sa maong mga camera arun nga daling ma-aksyonan kung ugaling adunay insidente nga mutumaw.
Dili usab problema ang kasakyan sa mga pasahero gumikan kay giingung adunay pipila ka mga local government unit (LGU) sa probinsiya ang mi-commit kanila nga mu-abag usab sa terminal pinaagi sa pag-deploy usab sa ilahang mga bus.
Gidugang pa niini, 24/7 ang byahe sa mga bus sugod Oktubre 31 hangtod na sa Nobyembre 2 arun sa pag-cater sa mga pasahero, ingun man nga ‘shifting’ ang mga bus drivers arun nga makapahuway ug malayo sa disgrasya.(SBR)
