Natanggong sa prisuhan ang usa ka janitor human nga gituohang nanglungkab sulod sa usa ka mall sa lungsod sa Balamban, Cebu.
Giila ang dinakpan nga si Molin Secretaria, 27 anyos, ug residente sa Brgy. Biasong, sa nahisgutang lungsod.
Duha na ka tuig nga nagtrabaho si Secretaria sa maong mall isip usa ka janitor.
Sa pagpakighinabi sa Bombo Radyo kang Police Major Christian Torres, ang hepe sa Balamban Police Station, kini nagkanayon nga gilungkab sa maong dinakpan ang halin sa 13 ka mga establishments sa ground floor sa Gaisano Grand Mall niadtong Oktubre 27 sa gabii human nga nag-closing ang mall.
Nakuha sa dinakpan ang 80,000 pesos nga kantidad nga giingong halin gikan sa drawers sa mga establisimento ug nakuha pa kini sa CCTV sa mall.
Apan napakyas ang dinakpan sa paglungkab sa vault sa usa ka money changer diin aduna kini sulod nga 2-million pesos.
Dugang pa ni Torres nga mireport sa ilang buhatan ang usa ka mall tenant human masayud nga nalungkab ang ilang drawer ug nawala ang halin.
Narekober sa kapulisan ang kinawat nga kwarta human nga napugos si Secretaria nga pag-angkon sa maong binuhatan.
Matud pa ni Secretaria nga nadala lang kini sa ilang kalisud maong nabuhat niya ang giingong pagpangawat sa halin.
Nagkinahanglan ang dinakpan og kwarta gumikan kay halos usa na ka buwan nang gihilantan ang 2-anyos niyang kaluha.
Dugang pa ni Secretaria nga nagbasol kini human makonsensya sa iyang nabuhat. Gihimug-atan usab ni Secretaria nga dili kini tiggamitan og ginadiling drugas.
Nangayo karon si Secretaria og pasaylo ngadto sa management sa mall tungod sa iyang nabuhat.
Mag-atubang ang dinakpan og kasong robbery. (gn)
