CEBU CITY — Mitanyag ang Negros Oriental Provincial Police Office (NOPPO) og reward alang sa makahatag og impormasyon sa trigger man kinsang gituohang nagpatay sa radio commentator nga si Dindo Generoso.
Matud ni NOPPO Director Police Colonel Julian Entoma nga andam kining mohatag sa iyang usa ka buwan nga sweldo alang sa makatumbok sa nahimutangan sa gituohang trigger man nga si Police Corporal Rodgie Rubio.
Gibutyag ni Entoma nga ni-absence without leave si Rubio sukad pa niadtong Nobyembre 8, adlaw nga Biyernes.
Tulo na ka adlaw nga wala motunga sa pagserbisyo ang maong police officer.
Nang-request sila og stoppage sa sweldo ni Rubio aron dili niya madawat ang iyang binuwang sweldo.
Dugang pa ni Entoma nga base sa ilang nahipos nga CCTV footage duol sa crime scene, si Rubio mao ang gituohang nagpusil sa magsisibya diin naka-helmet kini.
Nanawagan kini sa publiko nga kung kinsa man ang makahatag og impormasyon sa nahimutangan sa maong police officer, makig-alayon lang sila sa buhatan sa kapulisan.
