CEBU CITY — Misaad ang dili moubos sa 200 ka myembro sa Tau Gamma Phi – Cebu City nga mo-donate ug dugo sa ipahigayon nga Dugong Bombo 2019 karong Nobyembre 16, adlaw nga sabado.
Kini ang gibutyag sa Vice Chairman sa Tau Gamma Phi Cebu City Council nga si Dino Arisgado atol sa pagpakighinabi sa Bombo Radyo Cebu.
Matud ni Arisgado nga mipahibalo ang kanhi chairman kanila kabahin niini kung diin kini na ang ika-3 nga higayon sa pag-donate og dugo sa tinuig nga bloodletting activity sa Bombo Radyo.
Giimbitar usab ni Arisgado ang mga kaubanan niini sa Talisay Council ug Mandaue Council sa pagsalmot sa maong aktibidad.
Gitataw sa vice chairman nga andam gayud silang mutabang sa mga kalihokan nga sama niini gumikan kay parte usab kini sa ilang proyekto.
Gikalipay nila nga nakadawat sila og imbitasyon para makatabang usab sila sa mga nanginahanglan.
