Naugdaw ang upat ka mga panimalay human miulbo ang dakong sunog atol sa pagsugat sa Pasko sa Sitio Abbya, Brgy. Mambaling, sa dakbayan sa Sugbo.
Nakadawat og alarma ang mga kabumberuhan pasado alas-12 sa tungang gabii ug giisa kini sa third alarm.
Napalong ang dakong ka’yo sa maong sunog pagkalabay sa usa ka oras.
Matud ni Fire Officer 2 Emerson Arceo sa Cebu City BFP, nga nagsugod ang sunog sa panimalay ni Alyas Inday.
Base sa ilang imbestigasyon, nag-brownout ang maong lugar atol sa paghaguros sa bagyong Ursula.
Dugang pa ni Arceo nga pagkalabay sa pipila ka minutos, mibalik sa normal ang suplay sa kuryente apan kalit lang nga nag-spark ang panimalay ni Alyas Inday hinungdan nga miulbo ang sunog.
Moabot usab sa P30,000 ang danyos sa maong sunog ug walay natalang mga casualties.
Padayon pang gikumpirmar sa kabumberuhan kung unsa man ang hinungdan sa dakong sunog atol sa Pasko.
Samtang moabot usab sa P660,000 ang danyos sa nahitabong sunog sa Prince Warehouse kagabii sa Alang-alang, Mandaue City.
Base sa report sa Mandaue City Fire Department, nga posibleng faulty electrical wiring ang hinungdan niini.
Milanat ang maong sunog og dul-an sa duha ka oras usa pa kini napawong.
