Natanggong sa prisuhan ang usa ka high value target human nakuhaan og dul-an sa P10-million nga balor sa shabu atol sa buybust operation sa Jones Avenue, Brgy. Sta. Cruz, dakbayan sa Sugbo.
Giila ang dinakpan nga si Norman Flores Burgos, 37 anyos, ug residente sa Brgy. Hipodromo sa nahisgutang dakbayan.
Matud ni Police Master Sergeant Ramonito Canaca sa Abellana Police Station nga nadakpan ang maong regional level nga target human sa duha ka buwan nga surveillance.
Nakuhaan ang maong dinakpan og 1.4 kilos nga shabu ug mokantidad kini og P9.6-million.
Dugang pa ni Canaca nga taud-taod nang nalambigit sa ilegal nga negosyo si Burgos diin naka-disperse kini og usa ka kilo matag semana sa Cebu ug Bohol.
Mag-atubang ang dinakpan og kasong kalapasan sa Comprehensive Dangerous Drugs Act of 2002.
