Mopahigayon ang mga namunuan sa Bombo Radyo Philippines og tinuig nga Top Level Management Conference sugod karong adlawa, Enero 6, hangtud na sa Enero 11 sa Iloilo City.
Ubos sa temang “In Step with Digital Technology,” han-ayon sa network ang tanang mga lakang alang sa mas gipakusog nga pagsibya ug pag-alagad sa kahanginan ug sa online world.
Tungod niini, mipadayag ang chairman sa network nga si Dr. Rogelio M. Florete nga pakusgan pa sa Bombo Radyo ug Star FM ang pagserbisyo ngadto sa mas daghang Pilipino ubos sa 30 key cities and provinces nationwide.
Samtang palambuon pa ning tuig 2020 ang upgraded nga pagbalita ug pagpanerbisyo sa network pinaagi sa mga digital platforms, lakip na ang Facebook live alang sa mga Pilipino abroad.
Subay niini, mipasalig ang President ug CEO sa Bombo Radyo Philippines nga si Ms. Margareth Ruth C. Florete nga barugan sa matag empleyado ang responsibilidad nga gitagana sa network.
Pasabot niini, nga mahimong mas responsable ang matag kawani sa paghatud sa lab-as nga kasayuran, pag-angkon sa responsibilidad, ug mahimong patas sa tanan.
Mi-awhag usab si Ms. Florete nga saksihan sa matag Pilipino ang mas nagkanindot nga 3rd National Bombo Music Festival nga ipahigayon sa West Visayas State University karong Enero 11.
Magtigi ang 12 ka mga finalist alang sa live performance nga giduyugan og musika gikan sa 31-piece Bombo Symphony Orchestra.
Karong tuiga, ipaubos ang kompetisyon sa makuti nga pag-judge pinaagi sa mga panel of judges nga naglangkub nilang: National artist for music Ryan Cayabyab, award-winning composer nga si Vehnee Saturno, singers nga silang Bituin Escalante ug Myrus Ramirez, ug Jesuit composer nga si Fr. Peter Pojol.
