CEBU CITY – Walay pagtahud ug usa ka pagyaga-yaga sa relihiyoso nga aktibidad ang paghinugawan ni Jason John Tapales a.k.a “Boy Laway”.
Kini ang gihimug-atan ni Cebu City Police Office Director Police Colonel Engelbert Soriano.
Matud ni Colonel Soriano nga bisan pa man ug walay criminal penalty sa gibuhat ni Tapales apan alang kaniya ang wala pagtahud niini sa okasyon ang angayan nga i-penalize.
Subay niini, nanghinaut ang police director nga adunay aksyon nga pagabuhaton ang Cebu City government batok kang Tapales arun nga dili na kini sundon sa uban sa mga musunod pa nga Sinulog Festival.
Samtang, gipahibalo usab ni Soriano nga makig-alayon pa kini sa Cebu Provincial Director arun nga ilahang ma-istoryahan ang lakang nga angayan nila nga buhaton kalabot niini.
Kahinumdoman nga una nang mimando si Colonel Soriano nga ideklarar nga ‘persona non grata’ si Tapales human sa gibuhat niini nga paghugaw-hugaw atol sa dakong kapistahan sa dakbayan sa Sugbo.
