CEBU CITY-Dili gusto si Cebu City Vice Mayor Michael Rama nga dili makapangandam ang dakbayan sa Sugbo aron malikayan ang sakit nga polio og dengue.
Matud sa Bise Mayor kinsa mao usab ang chairman sa Committee on Health sa konseho nga kung gipangandaman sa publiko ang Coronavirus disease (CoVid-19) angay lang usab nga dili mokumpiyansa ang syudad sa sakit nga polio ingon man dengue sanglit moresulta usab kini sa kamatayon.
Subay niini gustong iduso sa opisyal ang pagplastar sa budget kung gikinahanglan ang bakuna batok sa naasoy’ng mga sakit. Giklaro usab ni Rama nga kinahanglan nga mapangandaman sa city health department ang pagplastar sa comprehensive plan alang sa maong concerns.
Kahinumduman nga nasuta sa departamento sa panglawas niadtong petsa 15 niining buwan sa Pebrero ang polio virus sa Butuanon river nga sumpay usab sa sapa sa Mandaue City.
Samtang bulan sa Enero ning kasamtangang tuig nakatala ang city health department og tulo ka patay gumikan sa sakit nga dengue kung diin taas ang maong ihap sa duha ka patay nga natala sa susamang bulan niadtong nakalabay’ng tuig.
