CEBU CITY – Nagkadaiyang kontrabando ang nasakmit sa kapulisan sa Police Regional Office 7, PDEA 7 ug Bureau of Jail Management and Penology sulod sa Cebu City Jail sa gipahigayon nga greyhound inspection kaganihang buntag.
Nakuha sa mga operatiba ang mga gituohan nga pakete sa shabu, kapin gatusan ka mga drug paraphernalia, 59 ka mga alahas, 141 ka mga mobile phones, ug 58 ka sim cards.
Gawas sa mga nahisgutan, nasakmit usab ang mga improvised bladed weapon, sigarilyo, condom ug mga ‘kalaka’ nga gituohang gigamit sa mga piniriso isip ilahang sugal.
Gipadayag ni PRO 7 Regional Director Police B/General Albert Ignatius Ferro nga nakuha nila ang mga iligal nga drogas sa septic tank kung diin gipasok sa mga piniriso apan ilaha kining nasayran pinaagi sa ilahang informant.
Samtang, gisiguro usab ni Jail Supt. Julius Arro, ang warden sa Cebu City Jail nga lakip sa ipahigayon nga imbestigasyon ang iyahang mga tawo kung diin mibahad kini nga muhatag ug disciplinary action batok sa mga jail officers nga adunay kalambigitan sa pagpasulod sa mga kontrabando sa jail facility.
Giangkon usab niini nga adunay problema ang Cebu City Jail kung diin gikinahanglan nila ang mga high-tech nga ekipo arun nga dili basta makasulod ang mga kontrabando sa pasilidad.
