CEBU CITY-Gikompirmar ni Dr. Jenifer Laurente ang OIC-head sa Department of Veterenary Medicine and Fisheries (DVMF) sa Cebu City nga nakakumpiskar sila og 280 kilos ka mga pagi (stingray) sa may South Road Properties (SRP).
Kini pinaagi matud pa sa operasyon nga gihimo sa DVMF, Maritime og Bantay Dagat.
Sigon ni Laurente sa dihang nahinabi sa Bombo Radyo Cebu sa tulumanong Zona Libre nga dugay na matud pa nga duna’y magpalusot og mga pagi bisan paman kanunay ang ilang pagroving sa area apan karon nataymingan na gyud.
Pito ka kahon sa pagi ang nakumpiskar ug kini na matud pa ang labing dako nga operasyon sa ilang buhatan.
Gipasabot ni Laurente nga gidili gyud ang pagpanguha og pagi sanglit nalakip na kini sila sa mga ‘endangered species’ kun mga mananap nga nagtikahurot na.
Nakalatid usab sa City ordinance 2496 ang pagdili sa pagpanguha niining matang sa isda.
