CEBU CITY — Hangtud asa maabot karon ang imong singko pesos, mga ka-Bombo?
Gipamatud-an karon sa mga managhigala sa Dalaguete, Cebu nga taas kaayo ang padulngan sa singko pesos karon.
Nag-viral karon sa social media ang video kung diin milinya ang mga managhigala aron makakanta sa ilang paboritong kanta sa videokehan.
Makita sa video nga nagpasa-pasa og microphone ang managhigala sa usa ka kanta sa kantidad nga singko pesos matag kanta.
Natagamtaman gayud sa matag usa ang matag linya sa ilang favorite song, bisan pa man og pang-videoke lang ang pipila ka mga tingog.
Matud sa nag-upload sa video nga si Olga Kho nga giselebrar nianang panahona ang birthday sa ilang auntie ug gusto nilang ma-enjoy ang videoke session nga walay mahitabong kagubot.
Tungod sa teamwork ug sakto nga timing, naka-angkon sila og score sa videoke nga 99.
Niabot karon og kapin 2-million ang views sa maong video sa social media.
