CEBU CITY — Gihimug-atan sa Bureau of Fire Protection (BFP)-7 nga mahinungdanon ang pagpanginlabot sa komunidad sa panahong motumaw ang dakong sunog.
Kini ang nahimong panawagan sa regional director nga si Fire Senior Supt. Gilbert Dolot subay na ning pagsaulog sa Fire Prevention Month.
Matud ni Dolot nga padayon ang ilang pag-educate ngadto sa publiko kung unsaon paglikay sa sunog.
Nasagmuyo hinuon si Dolot gumikan kay gamay lang ang mitando sa ilang gipahigayong simulation exercises alang sa maong trahedya.
Mihangyo karon ang BFP-7 sa publiko nga mosanong sa ilang mga programa alang sa luwas nga pamuyo batok sa sunog.
‘Mga angayang buhaton vs. sunog’
Gihatagan usab og importansya ni Dolot ang maayong kalidad sa mga electrical appliances ug mga wirings aron dili motumaw ang dakong ka’yo.
Kini human nga nabantayan sa ahensya nga sagad sa mga sunog nga niulbo sa rehiyon gumikan lang sa overloading sa kuryente ug substandard nga mga electrical accessories sama lang sa wires ug uban pa.
Mitambag kini sa mga tagbalay nga dili magpataka og taog sa kuryente kung dili safe ang koneksyon niini.
Samtang mipahinumdom si City Disaster Officer Harold Alcontin nga magbinantayon sa kanunay aron kalikayan ang sunog ning fire prevention month.
Kini sama lang sa pag-atiman ug pagmatngon sa paggamit og butane canister stove gumikan kay dali kining mosilaob.
Ang tema sa Fire Prevention Month karong tuiga mao ang “Matuto ka. Sunog iwasan na.”
