CEBU CITY — Patay ang usa ka 18-anyos nga ulit-tawo human gidunggab sa mga kawatan kagabii sa Sitio Mahayahay, Brgy. Pardo, dakbayan sa Sugbo.
Giila ang biktima nga si James Daniel Espinosa, tinun-an sa kolehiyo, ug nagpuyo sa Brgy. Mambaling sa susamang dakbayan.
Base sa inisyal nga imbestigasyon sa kapulisan, nagkuyog si Espinosa ug ang menor-de-edad niyang girlfriend sa dihang gi-atake kini sa duha ka mga kawatan.
Matud sa hepe sa Pardo Police Station nga si Police Master Sergeant Julieto Elarcosa nga gilabni sa mga kawatan ang cellphone sa dalagita apan misukol ang maong ulit-tawo ngadto kanila.
Nakalingkawas hinuon ang babaye apan naputos sa samad-dinunggaban ang ulit-tawo human gipatay sa mga responsable niini.
Dugang pa ni Elarcosa nga ngitngit ug mingaw ang maong lugar hinungdan nga nakahigayon ang mga kawatan sa maong panghitabo.
Sa kasamtangan, giila pa karon sa kapulisan ang identity sa mga suspetsado subay na sa pagpangita niini. (GN)
